Árshátíð SVFK var haldin s.l. laugardagskvöld og er óhætt að segja að vel hafi tekist til. Húsfyllir var og allir veislugestir virtust skemmta sér vel.  Veislustjórn var í höndum Hans Unnars Ólafssonar formanns SVH og ræðumaður kvöldsins var Ingólfur Þorbjörnsson fyrrverandi formaður L.S. Villti kokkurinn Úlfar Finnbjörnsson sá svo um villibráðarhlaðborð á heimsmælikvarða þar sem ekkert var til sparað og matargestir nutu dásemdanna í botn. Ræddu gestir um hreint og klárt „bragðlaukarallý“ þar sem hnísa, skarfur, lax, gæs, rjúpa, dádýr, hrefna, svartfugl, hreindýr og sjóbirtingur, svo eitthvað sé nefnt, spiluðu aðalhlutverkið. Verðlaunaafhendingarnar voru á sínum stað og að sjálfsögðu happdrættið þar sem fjöldi glæsilegra vinninga voru í boði. Dansað var fram eftir nóttu við undirspil dúettsins Bara Tveir. Stjórn félagsins vill þakka öllum þeim sem lógðu hönd á plóginn við að gera hátíðina sem glæsilegasta og vill jafnframt þakka veislugestum fyrir góðar undirtektir.  

Veiðin í Reykjadalsá í Borgarfirði þetta árið einnkenndist af miklum vatnsskorti þar sem lítið sem ekkert rigndi í Borgarfirðinum allan veiðitímann. Laxinn var mættur í ána um mánaðamótin júní/júlí og var þó nokkuð af fiski í ánni þótt vatnsskorturinn hefði þau áhrif að fiskurinn tók frekar illa og faldi sig víða undir bökkum og slýi. Undantekningin frá þessu ástandi voru miklar rigningar í lokunarhollinu með tilheyrandi vatnavöxtum. Þótt lítið sem ekkert væri hægt að veiða frá Rauðsgili, sem er veiðstaður nr. 22, og niður úr sökum aurburðar þá náðust á land 23 laxar. Fullt var af fiski á þeim stöðum þar sem hægt var að kasta.

 Heildarveiðin þetta árið var samt frekar slök eða 160 laxar samanborið við tvö fyrri ár þar sem veiddust 230 laxar árið 2010 og 250 laxar árið 2009.